O perfil profesional e formas xurídicas na xestión cultural galega. O traballo en equipo. Con Sergio Lago e Diego Parajó

Dentro do bloque adicado ao marco profesional da xestión cultural, hoxe tocounos coñecer de preto o perfil profesional de as formas xurídicas na xestión cultural galega. Unha sesión que impartiu o co-director do Curso, Sergio Lago, e que comezou coa presentación do equipo de titores e titoras que acompañarán ao alumnado nesta oitava edición. Visitaron a nosa aula Diego Parajó, Sonia Díaz e Diego Vázquez Meizoso, mentres que Beatriz Fontán fixo unha pequena conexión en liña para saudar ao alumnado e presentarse.

A continuación, a xornada centrouse en definir o perfil da xestora ou xestor cultural. Que estudou, que sabe facer, que quere facer… pero tamén de que maneira opera e como se relaciona co sector público e co sector privado.

No desenvolvemento desta reflexión puidemos ver convocatorias no Diario Oficial de Galicia e en boletíns oficiais das provincias, así como no Boletín Oficial del Estado, achegarnos aos convenios sectoriais e ao Estatuto do Artista.

O traballo cultural no ámbito privado

Boa parte da sesión estivo adicada a explicar o traballo da xestión cultural por conta propia ou, o que é o mesmo, a ser autónomas. A sesión ofreceu información práctica, como os pasos a seguir para darse de alta, canto supón ser autónoma, como facturar e, por suposto, a gran pregunta: sabes canto cobrar pola túa hora como freelance?…

Pero o ámbito privado non ten por que significar un traballo solitario. O auto-emprego permite a creación de colectivos informais, a unión temporal de autónomos (non só de empresas), diversas fórmulas de asociacionismo, o cooperativismo e mesmo unha SL.

Isto é un brevísimo resumo de todo o falado nesta aula, que serviu para ter unha ampla panorámica das posibilidades da xestión cultural e poder decidir con maior coñecemento de que implica a opción baixo a que finalmente decidamos traballar.

O plan de traballo do Curso

Nesta sesión tamén tivemos tempo para achegarnos, da man de Diego Parajó, ás claves do traballo en equipo. Unha aproximación a problemas, retos, solucións e oportunidades que iremos atopando ao longo dos vindeiros meses, xa que será así -en equipo- como o alumnado desta oitava edición desenvolverá o seu proxecto cultural.

Para abordar este reto Diego falounos de metodoloxías áxiles, planificación inversa e follas de ruta, ademais de farramentar virtuais para o traballo colaborativo, como Miro, Slack, Trello ou Asana. Estamos listas para comezar! ;)