Sesión inaugural do Curso: Fátima Anllo

O pasado venres, 3 de outubro, inauguramos o Curso de Experto Universitario en Xestión Cultural, na Facultade de CC. Económicas da USC. Logo da presentación oficial, a cargo de Isabel Neira, Sergio Lago e Marcos Lorenzo, a primeira das profesoras convidadas, Fátima Anllo, impartiu unha clase maxistral sobre os piares teóricos da xestión cultural.

Ao longo da súa exposición, Fátima lembrounos que o traballo d* xestor/a cultural se desenvolve nun contexto social e no seo dunha organización (sexa empresa, administración pública ou asociación), e que por tanto debe ser rigoroso, partir dun diagnóstico e estar debidamente planificado. É un labor creativo, si, pero ao servizo dun interese colectivo e non (só) das nosas propias apetencias.

Durante a sesión xurdiron moitos asuntos de interese, en ocasións mesmo sorprendentes. Así, Fátima fixo fincapé en que a programación cultural non é un fin en si mesmo senón unha ferramenta máis para acadar un obxectivo cultural. Do mesmo xeito, cuestionou esa visión tan extendida segundo a cal a cultura é boa de seu, e que, en consecuencia, o gasto público en cultura está plenamente xustificado e non é preciso avalialo. Tamén argumentou que en España, contra o que se pensa, o sector cultural vive en moita menor medida dos fondos públicos que nos países anglosaxóns (o gasto liquidado en cultura das administracións españolas apenas chega ao seu verdadeiro destinatario: a cidadanía). E remarcounos que unha das funcións esenciais do xestor/a cultural consiste en dar sentido á organización na que opera.

Unha primeira xornada intensa, á espera do segundo dos nosos convidados, Juan Freire e o seu “Manifesto Crowd“