A orientación do Curso é eminentemente aplicada, primando os casos prácticos a explorar na aula, ademais do contacto directo con profesionais de prestixio e con institucións do sector. Este enfoque susténtase no principio de “aprender facendo”, e pretende estimular as destrezas do alumnado, así como incrementar as súas capacidades útiles para o desempeño laboral.

A combinación de formación integral na xestión de proxectos culturais e de punto de encontro sobre liñas de traballo innovadoras na profesión, permite que resulte de interese tanto a persoas recén graduadas como a profesionais en activo do sistema cultural – traballadoras de empresas e entidades culturais, técnicas de cultura das administracións, responsables asociativos, xerentes de eventos, autónomas, etc.- que queiran actualizar os seus coñecementos ou que desexen, se non puideron facelo anteriormente, adquirir unha formación regrada que consolide o oficio logrado en base á súa experiencia.

O Curso facilitará ás alumnas e alumnos que así o desexen a posibilidade de realizar prácticas optativas en entidades e empresas culturais galegas de referencia.